Ervin Salianji zbulon “luftën” që ka mbërthyer PD: Shumë deputetë demokratë duan ‘kokën’ e Sali Berishës, ja pse…

Një patericë që e mban kryeministrin Edi Rama ende në pushtet. Kështu e quan ish-deputeti demokrat, Ervin Salianji kreun e Partisë Demokratike, Sali Berisha, të cilit i thotë se duhet të japë dorëheqjen që t’i hapë rrugë rrëzimit të Ramës. Në një intervistë për mediat dje, ish-deputeti Salianji thotë se sot Berisha është pengesa për rrëzimin e Ramës dhe pikërisht kjo është arsyeja përse në protestë drejtohen edhe thirrje kundër tij. Salianji e lexon protestën si një lëvizje që po ekspozon bashkëqeverisjen Rama-Berisha. “Berisha e ka kthyer në një biznes partinë për interes personal, që ka bllokuar shpresën për ndryshim.

Dhe prandaj kjo protestë e ka reagimin edhe ndaj PD. Berisha sot është pengesa për të rrëzuar Ramën,. Edhe sot që kjo protestë është kaq masive dhe me energji, qytetarë që një pjesë s’kanë qenë votues të PD, janë frymëzuar edhe për të larguar Berishën si pengesë për të sjellë ndryshimin. Avantazhi i Ramës është Berisha. Berisha është me i vjetër se Ramën, me më shumë probleme ndërkombëtare. Rama ka problematika me pushtetin, të faktuar nga SPAK, por qytetarët shqiptarë nuk mund të prapojnë të imponohen mes dy të këqijave. Qytetarët po ekspozojnë bashkëqeverisjen Rama-Berisha dhe regjimin Rama-Berisha po e godasin në thelb”, deklaroi ai.

Salianji: Deputetët që protestojnë po kërkojnë tërthorazi dorëheqjen e Berishës dhe hapjen e garës në PD

Më tej ish-deputeti Ervin Salianji e sfidoi Sali Berishën, teksa i thotë që nëse i mbështet kërkesat e protestuesve,, atëherë të japë dorëheqjen nga drejtim i Partisë Demorkatike, sepse edhe kjo është një prej kërkesave të qytetarëve. “Po bie një mit që shqiptarët nuk ngrihen. U organizuan vetë dhe qytetarët po godasin një themel një sistem biznesi me dy ortakë. Njerëzit po ngrihen për problemet e tyre, jo pse më goditi aty, pse s’mu dha leja pak më parë. Secili del për problemin e tij, në thelb po çohen dhe po ngrihen për të drejtat dhe liritë themelore. Këto politikisht Rama rrëzohet, ose Berisha ikën.

Në teori, por edhe me atë që ka treguar historia, qeveritë rrëzohen me protesta masive paqësore. Në autokraci e mban secili me forcë, kapen pas karriges këta dhe nuk lëvizin. Prandaj duhet të jetë aq pjesëmarrje që të largohen. Ky paradite shan protestues, pasdite thotë jam me kërkesat e tyre. Jep dorëheqjen, nëse je me ata. Kur autokrati nuk tërhiqet duhet të japë shembull drejtuesi i opozitës. Tha bashkohem me kërkesat e protestuesve. Kërkesat janë të iki Rama dhe Berisha”, u shpreh Salianji.

Edhe pjesëmarrjen e deputetëve demokratë në protestë, Salianji e sheh si një mënyrë të tyre për ti kërkuar Berishës dorëheqjen dhe hapjen e garës për një drejtues të ri në krye të demokratëve. “Demokratët që dalin në shesh, janë demokratë që bashkohen me thirrjet për largimin e Berishës. Edhe deputetët që shkojnë atje, nuk ia thonë drejtpërdrejtë largohu, por ia thonë në mënyrë të tërthortë duke marrë pjesë në protestë.

Sot paterica që e mban Ramën të rrijë aty, është Berisha. Rama e përdor si gogol, mirë të iki unë, po kush të vijë gogoli. Unë shikoj dhe shpresoj që Rama të dëgjojë thirrjet e qytetarëve dhe të dorëhiqet, po ashtu të dëgjojë dhe Berisha për të përshpejtuar rënien e Ramës. Sot jemi në një situatë ku duhet të marrë zë dhe jehojë thirrja e qytetarëve për heqjen e Ramës”, vijoi Salianji.

Ish-deputeti komenton zgjedhjen e Kryesisë së re

Ndërkaq ish-deputeti Salianji komentoi edhe zgjedhjen e Kryesisë së re të PD-së, për të cilën thotë se gara ishte e paracaktuar dhe se Berisha shpalli fitues ata që i bëjnë më shumë like, duke lënë jashtë kontributorë të partisë. “Ka zgjedhur në kryesi grupin që i bëjnë me shumë like në rrjete. Ata njerëz i njohin vetëm rrjetet e Berishës. kryesia e uzurpatorit, ka një veçori që më konfirmon narrativën, që urren fituesit,. Më e votuara Dhurata Çupi në Këshill Kombëtar, nuk e futën fare në garë, Fidel kreka mori 7 mijë vota në garë për deputet në Korçë, e nxorën me pak vota. Ku ka garë aty. Ndoja mori 9 mijë vota në Durrës, doli aty nuk fitoi. Ka qenë e paracaktuar dhe ka goditur fituesit. Shkodra nuk ka përfaqësim, Korça nuk ka përfaqësim. Ata që marrin votat te qytetarët goditen aty”, theksoi Salianji.

Salianji sulmon Nokën

Nga ana tjetër, akuzave të Berishës dhe Flamur Nokës se i shërben PS, Salianji i përgjigjet kështu. “Unë kam bërë burg nga Rama, këta kanë bërë para. Unë kam fituar kur kam qenë përballë Ramës, këta i ka thyer në mes që nga 2013. Po në 2013 kush ua vodhi zgjedhjet, kur ishte në pushtet. Janë njerëz që nuk përfaqësojnë më gjë. Këta janë shërbëtorë dhe bashkëaksionarë me Ramën”, nënvizoi Salianji.