Shpërthen bombola e gazit në Fier, mbeten 2 të plagosur jashtë rrezikut për jetën

Një incident i rëndë u shënua pasditen e sotme në lagjen “1 Maji” në Fier, ku një bombol gazi dyshohet se ka shpërthyer aksidentalisht brenda një banese, duke shkaktuar jo vetëm flakë, por edhe panik në zonë.

Ngjarja ndodhi rreth orës 18:30. Si pasojë e shpërthimit, kanë mbetur të lënduar dy persona, shtetasit E. T., 63 vjeç dhe A. R., 41 vjeç, të cilët janë dërguar menjëherë në spital. Burime zyrtare bëjnë me dije se ata ndodhen jashtë rrezikut për jetën, por kanë pësuar djegie në trup.

Në vendngjarje ndërhynë me urgjencë forcat zjarrfikëse, të cilat arritën të lokalizonin flakët dhe të parandalonin përhapjen e zjarrit në banesa të tjera përreth. Policia, së bashku me grupin hetimor, po punon për zbardhjen e plotë të shkaqeve të ngjarjes.

Ngjarja shkaktoi alarm te banorët e lagjes, të cilët reaguan menjëherë për të ndihmuar të dëmtuarit, duke përdorur mjete rrethanore deri në mbërritjen e forcave zjarrfikëse.

Paraprakisht dyshohet se gjithçka ka ndodhur për shkak të një defekti teknik ose pakujdesie në përdorimin e bombolës së gazit. Autoritetet bëjnë apel për kujdes maksimal në trajtimin e pajisjeve të tilla, sidomos në kushte shtëpiake.