Tirana-Partizani/ Mbyllet pjesa e parë, të kuqtë në avantazhin e një goli

Derbi i kryeqytetit mes KF Tirana dhe FK Partizani Tirana ka hapur javën e 33-të të Kategorisë Superiore, në një sfidë që këtë sezon ka më shumë peshë për renditjen sesa për garën për titull.

Tirana vjen në këtë përballje nën presion të madh, pasi pozicionimi në tabelë e mban pranë zonës së rrezikut. Bardheblutë kanë nevojë urgjente për pikë, pasi një fitore në derbi do të ishte shumë e rëndësishme për të larguar rrezikun e rënies dhe për të stabilizuar situatën në fundin e kampionatit.

Në krahun tjetër, Partizani po kalon një formë jo të mirë në javët e fundit dhe e sheh këtë ndeshje si një mundësi për t’u rikthyer te rezultatet pozitive.

Të kuqtë kërkojnë të mbajnë gjallë objektivin për “Final Four” dhe për një vend në garat europiane.

Ndeshja e luajtur në “Air Albania Stadium” është zhbllokuar në minutën e 22-të, kur Partizani ka kaluar në avantazh 1-0 me golin e Human, pas një aksioni të shpejtë të zhvilluar nga Sidibe në krahun e djathtë. Pjesa e parë është mbyllur me këtë rezultat, ndërsa loja ka vijuar me tension dhe raste nga të dyja skuadrat.

Sfida mbetet e hapur dhe me shumë rëndësi për fatet e sezonit për të dy ekipet, si në luftën për mbijetesë ashtu edhe për objektivat europianë.