Një baba vodhi 10,000 dollarë nga kursimet e djalit të tij 4-vjeçar për të bërë udhëtime luksoze

28-vjeçari rrëfeu në një episod të një programi financiar se zbrazi llogarinë bankare të të birit për të mbuluar koston e pesë udhëtimeve luksoze.

Një postier 28-vjeçar nga Misisipi shkaktoi polemika pasi pranoi në një shfaqje në YouTube se vodhi 10,000 dollarë nga llogaria bankare e djalit të tij 4-vjeçar për të financuar pushimet e tij. Ai më vonë deklaroi se nuk ndjente asnjë keqardhje për veprimet e tij.

Sipas New York Post, burri rrëfeu në një episod të një programi financiar se zbrazi llogarinë bankare të djalit të tij, të financuar kryesisht nga të afërmit, për të mbuluar koston e pesë udhëtimeve luksoze. Këto përfshinin vizita në New York, Disney World, Bahamas, Hjuston dhe Atlanta.

“E pashë si një kredi pa interes. Mendova se ishte e rëndësishme të krijoja kujtime me të dhe t’i jepja përvoja. Ia vlente,” tha ai në shfaqje.

Kur u pyet nëse e kuptoi se kishte vjedhur nga djali i tij, 28-vjeçari i hodhi poshtë kritikat. “Mendova se ai ishte 3 ose 4 vjeç tani; ai nuk do ta kuptonte,” u përgjigj ai.

Prezantuesi i emisionit, dukshëm i tronditur, e quajti aktin “të neveritshëm” dhe “egoist”, duke vënë në dukje se paratë mund të ishin investuar dhe të ishin rritur në mbi 40,000 dollarë kur djali i tij të mbushte 18 vjeç.

Babai i djalit gjithashtu pranoi se kishte bërë tërheqjet pa i thënë gruas së tij, e cila së fundmi u rekrutua në Ushtrinë Amerikane për të ndihmuar familjen të paguante një borxh prej 90,000 dollarësh.

Ai gjithashtu zbuloi se së fundmi kishte marrë hua nga kursimet e tij të pensionit për të mbuluar detyrime të tjera financiare, kishte marrë disa kredi personale dhe kishte bilance të papaguara në disa karta krediti, njëra prej të cilave kishte një normë interesi prej 25%. Në të kundërt, gruaja e tij nuk ka borxhe personale/CNN