Michelle Obama kujton si u kritikua për trupin e saj kur ishte Zonja e Parë e Shteteve të Bashkuara

Michelle Obama ka folur hapur për kritikat e ashpra që mori për pamjen e saj gjatë mandatit të saj si Zonja e Parë e Shteteve të Bashkuara, në një fragment nga intervista e saj në podcastin e Alex Cooper, “Call Her Daddy”.

Michelle Obama foli rreth mënyrës se si media shpesh përqendrohej te imazhi i saj, duke injoruar arsimimin dhe karrierën e saj.

“Historia filloi me atë që vesha, jo me arsimimin tim, jo ​​me karrierën time”, tha ajo, duke shpjeguar se narrativa publike injoronte faktin se ajo kishte studiuar në Princeton, ishte diplomuar në Shkollën e Drejtësisë të Harvardit, kishte ushtruar profesionin e avokates, kishte shërbyer si ndihmëse e kryetarit të bashkisë së Çikagos dhe kishte drejtuar një organizatë jofitimprurëse.

Ajo theksoi se shoqëria shpesh “i vendos gratë në vendin e tyre” përmes sulmeve ndaj pamjes së tyre, gjë që kërkon një ndërgjegjësim më të madh për mesazhet që riprodhohen dhe përvetësohen.

Në të njëjtën kohë, ajo theksoi se, ndërsa gratë fitojnë pushtet, është e rëndësishme të mos përjetësohen të njëjtat stereotipe problematike.

Diskutimi u prek edhe te politika, me Michelle Obaman që përsëriti qëndrimin e saj se pjesa më e madhe e shoqërisë nuk është ende gati të pranojë një grua si presidente. “Ka burra që thjesht nuk do të votonin kurrë për një grua”, tha ajo, duke bërë thirrje për një dialog të sinqertë mbi këtë çështje.

Në përfundim, ajo u dërgoi një mesazh grave më të reja: “Vazhdoni të ngjiteni. Kemi nevojë për ju. Edhe nëse ndonjëherë ndiheni sikur nuk ia keni dalë, mos u ndalni.”/CNN