VIDEO/ Akropoli nën stuhi! Moti ekstrem godet Greqinë, turistët përballen me vështirësi

Një stuhi e fuqishme ka goditur Athinën, duke sjellë reshje intensive shiu dhe erëra të forta që kanë prekur edhe zonën e Akropolit, një prej atraksioneve më të vizituara turistike në Greqi.

Turistët që ndodheshin pranë monumentit historik u përballën me kushte të vështira atmosferike, ndërsa moti i paqëndrueshëm ndikoi në vizitat dhe aktivitetet në zonën arkeologjike.

Greqia po përjeton një periudhë me fenomene ekstreme të motit, ku disa rajone janë përfshirë nga stuhi të forta, ndërsa zona të tjera vijojnë të jenë nën kërcënimin e zjarreve për shkak të temperaturave të larta dhe thatësirës.

Autoritetet kanë bërë thirrje për kujdes të shtuar për qytetarët dhe turistët, veçanërisht në hapësirat e hapura dhe zonat bregdetare apo turistike, deri në përmirësimin e kushteve atmosferike.

Ndryshimet e menjëhershme të motit po ndikojnë edhe në sezonin turistik, duke sjellë një verë të pazakontë në Mesdhe, ku temperaturat ekstreme dhe stuhitë e forta po vënë në provë planet e pushuesve.