Avioni luftarak bie mbi shkollë në Dhaka, 19 të vdekur e dhjetëra të plagosur

Një ngjarje tragjike ka ndodhur këtë të hënë në kryeqytetin e Bangladeshit, Dhaka, ku një avion luftarak i Forcave Ajrore është përplasur mbi një ndërtesë shkolle gjatë një fluturimi trajnimi, duke shkaktuar një shpërthim të madh dhe panik në zonë.

Incidenti ndodhi rreth orës 13:06 me orën lokale, kur një avion i tipit F-7 BGI, që kishte ngritur fluturimin nga baza ajrore Tejgaon, humbi kontrollin dhe u rrëzua mbi godinën e mensës së shkollës “Milestone School and College”, në zonën Uttara të Dhakës.

Pas përplasjes, një zjarr i madh shpërtheu në ndërtesën e goditur, duke shkaktuar një re të dendur tymi që u ngrit mbi zonën e banuar. Pamjet që kanë qarkulluar në rrjete sociale tregojnë momentin e rrëzimit dhe pasojat e tmerrshme që pasuan.

Një pjesë e madhe e ndërtesës është shembur, ndërsa nxënës, mësues dhe prindër janë parë duke dalë me vrap nga kampusi në përpjekje për t’u shpëtuar flakëve. Të tjerë janë përpjekur të ndihmojnë në gjetjen e të mbijetuarve nën rrënoja.

Një trup është nxjerrë tashmë nga rrënojat dhe më shumë se 50 persona janë dërguar në Institutin Kombëtar të Djegieve dhe Kirurgjisë Plastike në Dhaka me lëndime të rënda, shumica prej tyre me djegie. Viktimat përfshijnë si fëmijë ashtu edhe të rritur.

Autoritetet kanë bërë të ditur se operacionet e kërkim-shpëtimit janë ende në vazhdim dhe se numri i viktimave mund të rritet. Nuk është konfirmuar ende nëse piloti ka mundur të dalë i gjallë nga avioni përpara përplasjes, ndërsa identiteti i viktimës së parë nuk është bërë publik.

Forcat Ajrore të Bangladeshit kanë lëshuar një deklaratë ku konfirmojnë incidentin dhe njoftojnë se do të nisë një hetim të plotë për të zbuluar shkaqet e aksidentit. Kjo ngjarje ka tronditur opinionin publik dhe ka ngritur sërish shqetësimet për sigurinë në zonat urbane, sidomos pranë shkollave dhe institucioneve të tjera të ndjeshme. Situata në zonën përreth mbetet e tensionuar, ndërsa prindërit dhe të afërmit e nxënësve po presin me ankth lajme për të dashurit e tyre.