Moti kërcënon Botërorin! Temperaturat ekstreme dhe stuhitë mund të rrezikojnë ndeshjet

Kupa e Botës 2026 pritet të përballet me një sfidë të madhe përtej fushës së lojës: motin ekstrem.

Turneu, që do të zhvillohet në  Shtetet e Bashkuara të Amerikës, Kanada dhe Meksikë, mund të ndikohet nga temperaturat e larta, lagështia ekstreme, stuhitë me rrufe dhe zjarret masive, duke rrezikuar ndërprerje të ndeshjeve dhe probleme për tifozët.

Vapa përvëluese, stuhitë e forta dhe cilësia e dobët e ajrit mund të ndikojnë ndjeshëm zhvillimin e turneut më të madh të futbollit në botë. Gjatë verës, temperaturat në këto vende shpesh kalojnë 35 gradë Celsius.

Sipas ekspertëve, lagështia e lartë e bën nxehtësinë edhe më të rrezikshme për organizmin, duke rritur rrezikun e lodhjes fizike për lojtarët dhe tifozët. Në qytete si Miami, Houston dhe Dallas, temperatura e perceptuar mund të arrijë deri në 43 gradë Celsius.

Për këtë arsye, FIFA ka vendosur pushime të detyrueshme për freskim gjatë çdo pjese të lojës, si pjesë e masave për mbrojtjen e futbollistëve.

Një tjetër shqetësim mbeten stuhitë verore, veçanërisht në qytete si Atlanta, Miami dhe Houston, ku reshjet intensive dhe rrufetë janë të zakonshme.

Sipas rregullave në SHBA, nëse një rrufe regjistrohet brenda një rrezeje prej 16 kilometrash nga stadiumi, ndeshja duhet të ndërpritet deri në 30 minuta pas goditjes së fundit.

Përveç vapës dhe stuhive, organizatorët po monitorojnë edhe cilësinë e ajrit për shkak të zjarreve masive që kanë nisur herët këtë vit në Amerikën e Veriut.

Në vitin 2023, tymi nga zjarret në Kanada mbuloi disa qytete amerikane, përfshirë New York City, duke shkaktuar anulime aktivitetesh sportive dhe paralajmërime shëndetësore.

Ekspertët paralajmërojnë se kushtet atmosferike mund të sjellin vonesa, shtyrje ndeshjesh dhe probleme në transport për tifozët, duke e kthyer Botërorin 2026 në një nga edicionet më sfiduese nga pikëpamja klimatike.