‘Martesa mori fund!’/ Pas sherrit me gruan, burri tenton të shembë shtëpinë me ekskavator

Një ngjarje e pazakontë dhe tronditëse është regjistruar në Pensilvani të Shteteve të Bashkuara, ku një 48-vjeçar akuzohet se ka tentuar të shembë shtëpinë e tij me një ekskavator pas një konflikti me bashkëshorten.

Sipas autoriteteve, Erik Pierwsza u arrestua pasi dyshohet se përdori një ekskavator për të shkatërruar pjesën e pasme të banesës, ndërkohë që bashkëshortja dhe dy vajzat e tij ndodheshin ende brenda.

Hetuesit bëjnë me dije se ngjarja ndodhi pasi burri ishte kthyer në shtëpi pas një nate ku kishte konsumuar alkool. Gjatë debatit, bashkëshortja i kishte thënë se martesa e tyre kishte marrë fund. Sipas dokumenteve të policisë, ai i është përgjigjur: ‘Nëse gjithçka ka mbaruar, do ta shemb shtëpinë.’

Vetëm pak çaste më vonë, ai dyshohet se hipi në një ekskavator tip ‘Kubota’ dhe nisi të godiste strukturën e banesës. Pamjet e publikuara nga mediat lokale tregojnë dëme të mëdha në ndërtesë, me pjesë të saj të shembura plotësisht.

Gjatë telefonatës së emergjencës, operatorët dëgjuan britma dhe zhurmën e makinerisë së rëndë. Fatmirësisht, gruaja dhe dy vajzat arritën të largoheshin nga shtëpia pa pësuar lëndime.

Pas dëmtimit të banesës, 48-vjeçari u largua nga vendi i ngjarjes me automjet, por më vonë u vetëdorëzua në polici. Autoritetet thanë se ndaj tij janë ngritur disa akuza, përfshirë rrezikim të jetës së të tjerëve, shkaktim katastrofe dhe prishje të rendit publik.