Holanda zhvendos 86 ton ar nga SHBA dhe Kanadaja në Londër: Duhet të jemi gati për kriza gjeopolitike

Banka Qendrore e Holandës ka zhvendosur 86 ton ar nga depot ku ruheshin në Shtetet e Bashkuara dhe Kanada drejt Londrës, duke argumentuar se ndryshimi është bërë për ta bërë më të lehtë reagimin në rast të krizave gjeopolitike.

Vetë banka njoftoi se transferimi përfshin rreth 14% të rezervave të saj të arit, me një vlerë prej afërsisht 10 miliardë eurosh. Sipas saj, vendimi u mor për shkak të "paqëndrueshmërisë politike në rritje" dhe nevojës për të forcuar aftësinë e reagimit në situata të jashtëzakonshme.

"Ari që ruhet në Londër përmbush standarde më të larta cilësore dhe mund të shitet më shpejt në treg nëse lind nevoja për të siguruar likuiditet. Presim të mos na duhet kurrë t'i shesim, por duhet të jemi të përgatitur ta bëjmë", deklaroi Banka Qendrore e Holandës.

Pjesa më e madhe e operacionit nuk u realizua me transport fizik të arit. Banka shiti 59 ton ar që mbante në tregun e Amerikës së Veriut dhe bleu të njëjtën sasi në tregun londinez.

Ndërkohë, 27 ton ar u transportuan fizikisht nga Kanadaja në kasafortën e Bankës Qendrore në Zeist. Prej aty, një sasi e barabartë shufrash ari që plotësonin standardet ndërkombëtare u dërgua më pas në Londër.

Transporti fizik, me një vlerë mbi 3 miliardë euro, u mbajt sekret deri në përfundimin e operacionit për arsye sigurie. Banka nuk ka bërë të ditur se sa ka kushtuar sigurimi i kësaj lëvizjeje.

Sipas autoriteteve holandeze, arsyeja kryesore e transferimit është që rezervat e arit të jenë në një treg ku mund të shndërrohen më shpejt në para në rast të një krize të madhe ndërkombëtare.