Gazetarja e CNN shpërthen në lot pas tërmetit të sotshëm në Turqi: Ishte tepër i fortë

Dy lëkundje të forta tërmeti me magnituda 6.4 dhe 5.8 ballë Rihter goditën ditën e sotme provincën Hatay të Turqisë, pranë kufirit sirian.

Gazetarja turke e CNN-it, Buse Deviren, e cila po transmetonte drejtpërdrejt nga një kamp ku ndodheshin të mbijetuarit e tërmetit të 6 shkurtit shpërtheu në lot pas tërmeteve që tronditën vendin sot.

“Kam parë shumë njerëz duke ikur prej tendave nga frika se do të mbeten nën to”, tha ajo, teksa shtoi: “Kishte panik.

Toka po dridhej nën këmbët tona. Ne po dridheshim jashtëzakonisht shumë. Ishte një tërmet tepër i fortë. Nuk ishte si pasgoditje”.

Mësohet se shumë njerëz kanë mbetur nën rrënojat e ndërtesave të shembura.

Sakaq, Qendra Sizmike Evropiane paralajmëroi se zona bregdetare duhet të evakuohet urgjentisht, pasi ekziston rreziku i cunamit pas tërmeteve të fundit në Hatay.