Tiranë/ Sekuestrohen apartamente dhe garazh me vlerë 420 mijë euro, dyshohet se u përfituan nga trafiku i drogës

Policia e Shtetit ka finalizuar operacionin e koduar "De facto", në kuadër të hetimeve për gjurmimin dhe sekuestrimin e pasurive që dyshohet se burojnë nga veprimtari kriminale.

Si rezultat i hetimeve pasurore, të kryera me metoda speciale në bashkëpunim me Prokurorinë, është ekzekutuar vendimi i Gjykatës për sekuestrimin e dy apartamenteve dhe një garazhi, me një vlerë tregu rreth 420 mijë euro.

Sipas Policisë, pasuritë dyshohet se janë përfituar nga aktiviteti kriminal i shtetasit me iniciale H. A., 54 vjeç, i përfshirë në trafikimin e lëndëve narkotike.

Autoritetet bëjnë me dije se hetimet vijojnë për identifikimin dhe sekuestrimin e pasurive të tjera që mund të jenë përfituar nga veprimtaria kriminale e 54-vjeçarit ose e personave të lidhur me të.

Njoftimi i policisë:

Tiranë/Finalizohet operacioni i koduar “De facto”, si rezultat i hetimeve për gjurmimin dhe sekuestrimin e pasurive me burime kriminale.

Sekuestrohen apartamente dhe garazh, me vlerë rreth 420 000 euro, të përfituara nga trafikimi i lëndëve narkotike.

Në vijim të një hetimi pasuror, me metoda speciale, kryer në bazë ligjit nr. 10192, datë 03.12.2009, “Për parandalimin dhe goditjen e krimit të organizuar dhe trafikimit nëpërmjet masave parandaluese kundër pasurisë”, nga specialistët e Seksionit për Hetimin e Pastrimit të Parave dhe Aseteve Kriminale, në bashkëpunim me Prokurorinë, në kuadër të operacionit të koduar “De facto”, u ekzekutua vendimi i Gjykatës për sekuestrimin e dy apartamenteve dhe një garazhi.

Pasuritë, me vlerë tregu rreth 420 000 euro, dyshohet se janë përfituar nga veprimtaria kriminale e shtetasit H(A). A., 54 vjeç, në fushën e trafikimit të lëndëve narkotike.

Hetimi vijon për të gjurmuar dhe sekuestruar pasuri të tjera me burime kriminale, të 54-vjeçarit ose shtetasve të lidhur me të.

Materialet procedurale iu referuan Prokurorisë së Tiranës, për veprime të mëtejshme.