Trupi iu gjet i karbonizuar brenda banesës, policia zbulon se çfarë ndodhi në Fier

Një shkëndijë elektrike është një nga pistat kryesore që po hetohet për zjarrin fatal në fshatin Fermë Çlirim të Fierit, ku humbi jetën një 71-vjeçar.

Banesa ku i moshuari jetonte i vetëm u përfshi nga flakët dhe u shkatërrua pothuajse tërësisht. Pas shuarjes së zjarrit, brenda saj u gjet trupi i karbonizuar i 71-vjeçarit.

Shkaku i saktë i ngjarjes ende nuk është përcaktuar. Sipas burimeve pranë Komisariatit të Fierit, në shtëpi nuk kishte bombol gazi, çka ka bërë që hetuesit të përqendrohen te mundësia e një defekti apo shkëndije në rrjetin elektrik.

Puna e ekspertëve vështirësohet edhe nga dëmet e mëdha të shkaktuara nga flakët. Instalimet elektrike dhe pajisjet elektroshtëpiake janë djegur plotësisht, duke lënë pak elemente që mund të ndihmojnë në përcaktimin e origjinës së zjarrit.
 
Grupi hetimor po vijon këqyrjen e banesës dhe ka marrë në pyetje edhe familjarët e viktimës. Ata kanë treguar se në shtëpi përdoreshin pajisje elektrike të vjetra, një element që po merret në konsideratë gjatë hetimeve.

71-vjeçari jetonte prej vitesh i vetëm në Fermë Çlirim. Ai ishte baba i tre fëmijëve, dy vajzave dhe një djali, të cilët jetojnë në Vlorë.