Nuk mjafton të duheni/ Psikologu tregon 3 sjellje që forcojnë një marrëdhënie

Çfarë i mban disa marrëdhënie të forta edhe kur përballen me debate, pasiguri dhe periudha të vështira?

Psikologu Nick Wignall, i cili në punën e tij ka parë nga afër marrëdhënie që janë ftohur gradualisht dhe të tjera që janë prishur papritur, identifikon disa sjellje të përbashkëta te çiftet me inteligjencë të lartë emocionale.



Sipas tij, një marrëdhënie nuk forcohet vetëm nga dashuria, por edhe nga mënyra se si partnerët dëgjojnë, reagojnë dhe përballen me emocionet e njëri-tjetrit.

1. Kuptojnë para se të kërkojnë zgjidhje

Kur partneri është i shqetësuar, reagimi i parë shpesh është t’i japim këshilla ose të përpiqemi ta zgjidhim menjëherë problemin. Por jo gjithmonë kjo është ajo që kërkon personi përballë.

Në shumë raste, ajo që nevojitet fillimisht është të dëgjohesh dhe të ndihesh i kuptuar.

Në vend që t’i thuhet partnerit pse nuk duhet të shqetësohet, mund të nisni me një reagim të thjeshtë: “Më vjen keq. Duket se ka qenë e vështirë për ty.”

Vetëm pasi emocionet të jenë dëgjuar, biseda mund të kalojë te zgjidhjet.

2. Shikojnë përtej sjelljes

Një reagim i ashpër mund të duket i pakuptimtë nëse shihet vetëm në sipërfaqe. Por pas zemërimit mund të fshihet pasiguria, lëndimi, ndjenja e pavlerësimit apo turpi.

Çiftet emocionalisht të pjekura përpiqen të kuptojnë se çfarë qëndron pas një sjelljeje, pa e justifikuar atë kur është e papërshtatshme.

Në vend të një reagimi të menjëhershëm si “Sa i/e paarsyeshëm je”, pyetja mund të jetë: “Çfarë të shqetësoi kaq shumë?”

Kjo mund ta ndryshojë mënyrën se si zhvillohet një debat.

3. Nuk kanë frikë të tregojnë dobësitë

Të flasësh hapur për frikërat, pasiguritë, dhimbjet, shpresat dhe dëshirat nuk është gjithmonë e lehtë. Por hapja emocionale mund të krijojë më shumë besim dhe afërsi mes partnerëve.

Kjo bëhet veçanërisht e rëndësishme në marrëdhëniet afatgjata, kur çifti mund të ndiejë se ka humbur një pjesë të intimitetit dhe lidhjes së dikurshme.

Nuk është e nevojshme të nisni menjëherë me temat më të vështira. Mund të filloni me gjëra të vogla dhe të krijoni gradualisht një hapësirë ku të dy partnerët ndihen të sigurt për të folur.

Në fund, një marrëdhënie e fortë nuk do të thotë mungesë konfliktesh. Dallimi mund të jetë mënyra se si çifti i përballon ato: duke dëgjuar përpara se të gjykojë, duke kërkuar të kuptojë dhe duke pasur guximin të flasë hapur për atë që ndien.