“Jemi në kulmin e sezonit të gripit, njerëzit pa shërbim shëndetësor”, Braçe: Dua pyetje-përgjigje me ministren e shëndetësisë…

Deputeti socialist Erion Braçe ka qenë i ashpër në fjalën e mbajtur në nisje të seancës plenare.

Erion Braçe denoncon vonesën e qeverisë për t’iu përgjigjur shqetësimeve të qytetarëve për mungesën e shërbimeve shëndetësore në Njësinë nr.5, duke theksuar se mijëra banorë janë të pambuluar gjatë periudhës së gripit.

Erion Braçe: Kam paraqitur një proces për pyetje-përgjigje për ministren e Shëndetësisë. Ka të bëjë me mosfunksionimin e një qendre shëndetësore në zonën 5. Jemi në pikën e periudhës së gripit; mijëra njerëz në atë njësi dhe zonë nuk marrin dot shërbim shëndetësor në kohë dhe në kushte optimale për shëndetin e tyre. Kërkesën e kam paraqitur më 19 janar, sot jemi më 3 shkurt. Rregullorja ka 5 nene për disa lloje pyetjesh dhe nuk e gjen dot se kur e merr përgjigjen.

Ata njerëz atje prej 4 muajsh janë në nevojë; mendoja që duhet të ishte shqetësim i ministres për të kthyer përgjigje për këtë gjë sa më parë të jetë e mundur. Po ua them, çdo mënyrë tjetër e marrjes së përgjigjes është ezauruar. Po hyjmë në muajin e pestë me shërbim të kufizuar për ata njerëz. E dyta i referohet procesit të kërkesës për marrje informacioni. Ka institucione që i pyet për vezë, të kthejnë për bomba. Refuzojnë përgjigje sepse nuk u pëlqen ajo që them unë, punë e madhe.