Trump i ndryshoi emrin, Kanadaja instalon një tabelë të madhe: Liqeni Ontario, sot dhe përgjithmonë!

Kryeministri i Ontarios, Doug Ford i është kundërpërgjigjur Donald Trump duke instaluar një tabelë të madhe në anën e Kanadasë me mesazhin: “Liqeni Ontario. Tani dhe Gjithmonë”.

Presidenti amerikan nënshkroi një urdhër ekzekutiv të enjten duke kërkuar të ndryshojë emrin e liqenit në “Liqeni Amerika” dhe ka ndarë një seri videosh të gjeneruara nga inteligjenca artificiale rreth liqenit që shtrihet midis të dy vendeve.

“Shumë kohë para Presidentit Trump, ky liqen quhej Liqeni Ontario. Shumë kohë pasi Presidenti Trump të jetë larguar, ai do të quhet ende Liqeni Ontario”, tha Ford.

Ford tha se riemërtimi i liqenit nga Trump u bë sepse atij “nuk i pëlqente që Ontario dhe Kanadaja të mbronin veten”.

Duke qëndruar përpara tabelës së sapozbuluar të Liqenit Ontario, Ford shtoi: “Në rast se Presidenti Trump ose dikush tjetër harron, ne e kemi vendosur këtë tabelë për t’u kujtuar atyre se është Liqeni Ontario, tani e përgjithmonë.”

Lufta e fjalëve u shkaktua pasi bisedimet tregtare dështuan, me SHBA-në që vendosi tarifa të reja prej 50% për mallra kanadeze prej 20 miliardë dollarësh. Kanadaja njoftoi kundërtarifa që do të hyjnë në fuqi muajin e ardhshëm.

Trump tha se dekreti hyri në fuqi menjëherë pasi ai nënshkroi urdhrin për ta riemëruar atë në Liqeni Amerika. Ndërsa ai ka diskrecion të gjerë mbi mënyrën se si SHBA-të i njohin monumentet, vendet e tjera nuk janë të detyruara ta ndjekin atë.

Të shtunën, Google tha se kishte ndryshuar emrin në hartat e saj për përdoruesit në SHBA.