Starmer ironizon Macronin për syzet e diellit

Syzet e diellit të presidentit francez Macron, që i përdori në forumin e Davosit, vijojnë të jenë objekt diskutimi dhe batutash nga udhëheqësit botërorë. I radhës është kryeministri britanik Keir Starmer, i cili surprizoi publikun me një shfaqje satire gjatë një eventi në Londër, ku bëri edhe një referencë për presidentin francez Emmanuel Macron.

Starmer u shfaq në skenë me syze aviatori dhe me një qëndrim ironik, duke fituar menjëherë duartrokitjet e audiencës në sallë.

Ndër të tjera, kryeministri britanik, përveçse vuri syzet e diellit, tha “Bonjour”, duke shkaktuar të qeshura në sallë, ndërsa momenti u bë viral në rrjetet sociale.

Shakaja lidhej me paraqitjen e fundit të Macron-it në Forumin Ekonomik të Davosit, ku presidenti francez u pa me syze të ngjashme.

Keir Starmer shtoi me humor se mund t’i mbante ato syze edhe në takime ndërkombëtare, por theksoi se për punën në Parlamentin britanik i duhen syzet e zakonshme për të parë sa më mirë.

Jo vetëm Starmer, por edhe presidenti i SHBA-ve Donald Trump, gjatë forumit në Davos, e përqeshi presidentin francez për shfaqjen me syze dielli në konferencë.