Nga Londra në Nju Jork për 60 minuta - Britania nis planet për avionin hipersonik

Britania e Madhe ka hedhur hapin e radhës drejt një revolucioni në udhëtimet ajrore, duke nisur punën për zhvillimin e një avioni hipersonik që do të përshkojë distancën Londër–Nju Jork për vetëm një orë. Avioni me emrin “The Sabre” pritet të arrijë shpejtësinë Mach 5 (rreth 6,400 km/h), duke fluturuar në kufijtë e hapësirës dhe duke sfiduar çdo koncept tradicional të transportit ndërkontinental.

Ky projekt ambicioz është pjesë e iniciativës prej 6 milionë paundësh të quajtur “Invictus”, e udhëhequr nga kompania britanike Frazer-Nash dhe e mbështetur nga Agjencia Evropiane e Hapësirës (ESA). Avioni do të ketë aftësi për t’u nisur horizontalisht dhe synon të jetë plotësisht i ripërdorshëm, si për qëllime eksperimentale, ashtu edhe komerciale në të ardhmen.

Në thelb të këtij zhvillimi qëndron motori hibrid Synergetic Air-Breathing Rocket Engine (SABRE), që kombinon teknologjinë e motorëve të avionëve me atë të raketave. Inovacioni më i rëndësishëm është sistemi “pre-cooler”, i cili ftoh ajrin përpara se të hyjë në motor – një zgjidhje për temperaturat ekstreme që krijohen në fluturime hipersonike. Kjo teknologji eliminon nevojën për mbajtjen e oksigjenit në bord, pasi e tërheq atë drejtpërdrejt nga atmosfera në lartësi më të ulëta, duke rritur ndjeshëm efikasitetin.

Zhvillimi i avionit “Sabre” është planifikuar të ecë me ritme të përshpejtuara. Brenda 12 muajve të ardhshëm pritet të përfundojë dizajni përfundimtar dhe të nisë puna për sistemin e plotë të fluturimit. Testimi i parë parashikohet të realizohet deri në vitin 2031.

Sarah Wilkes, drejtore e Frazer-Nash, e cilëson projektin si një hap gjigant drejt së ardhmes: “INVICTUS është një mundësi e jashtëzakonshme për të zhvilluar teknologji të avancuar në fushën e hapësirës dhe mbrojtjes.” Ndërsa Tony Forsythe nga Agjencia Britanike e Hapësirës thekson se ky projekt është rezultat i përvojës disavjeçare të inxhinierëve britanikë në zhvillimin e sistemeve të shtytjes hipersonike.

Ndërkohë, edhe kompania amerikane Venus Aerospace është në garë me projektin e saj “Venus Stargazer”, një tjetër avion pasagjerësh hipersonik që premton të njëjtën kohë fluturimi – Londër në Nju Jork për vetëm një orë – me një demonstrim të mundshëm brenda këtij viti.

Teksa garat për udhëtime hipersonike intensifikohen, bota po i afrohet më shumë se kurrë një realiteti ku kontinentet mund të lidhen brenda pak minutash.