Britania në alarm nga vapa ekstreme, dhjetëra shkolla mbyllen për të mbrojtur nxënësit

Dhjetëra shkolla në Angli dhe Uells kanë vendosur të mbyllen ose të reduktojnë orarin mësimor për shkak të valës së të nxehtit që pritet të godasë Britaninë në ditët e ardhshme.

Mes institucioneve që kanë njoftuar mbylljen janë Shkolla Buckingham në Buckinghamshire, e cila do të zhvillojë mësimin online për dy ditë, si dhe St John’s Marlborough në Wiltshire, që do të mbyllet deri të premten.

Edhe Akademia Dorcan në Swindon ka njoftuar se mësimi do të përfundojë më herët, ndërsa shkolla do të qëndrojë e mbyllur për dy ditë.

Masa të ngjashme janë marrë edhe nga disa shkolla të tjera në Wiltshire, Slough, Reading, Surrey dhe Londër, ndërsa drejtuesit e institucioneve arsimore po përpiqen të minimizojnë rreziqet që temperaturat e larta paraqesin për nxënësit dhe stafin.

Shoqata Kombëtare e Drejtorëve të Shkollave (NAHT) ka shpërndarë udhëzime për menaxhimin e situatës, duke theksuar se megjithëse nuk ekziston një kufi maksimal ligjor për temperaturat në shkolla, drejtuesit duhet të marrin çdo masë të nevojshme për të garantuar sigurinë dhe mirëqenien e nxënësve.

Sekretari i përgjithshëm i NAHT-së, Paul Whiteman, deklaroi se drejtuesit e shkollave do të bëjnë gjithçka që është e mundur për të zbutur ndikimin e temperaturave ekstreme, të cilat pritet të arrijnë nivele të pazakonta për Britaninë.