Alarm për bombë në Harvard/ Evakuuohet zona pranë Memorial Hall, pezullohen autobusët

Alarm është dhënë në Universitetin e Harvardit në SHBA pas një kërcënimi për bombë në një prej godinave të kampusit.

Kërcënimi lidhet me Memorial Hall, ndërtesë ku ndodhet edhe Sanders Theatre, një nga sallat kryesore të leksioneve në universitet. Në afërsi ndodhet Annenberg Hall, hapësira e ngrënies që përdoret kryesisht nga studentët e vitit të parë.

Pas marrjes së informacionit, universiteti aktivizoi procedurat e emergjencës dhe u kërkoi personave që ndodheshin pranë zonës të qëndronin në ambiente të sigurta, ndërsa të tjerët u udhëzuan të shmangnin zonën.

Në njoftimin e shpërndarë nga Harvard, studentëve dhe stafit iu kërkua të ndiqnin udhëzimet e policisë dhe të prisnin informacionet e mëtejshme nga autoritetet universitare.

Si masë sigurie, shërbimet e autobusëve në zonën pranë Memorial Hall janë pezulluar përkohësisht.

Forcat e rendit po kryejnë kontrolle në zonën e prekur, ndërsa deri në këto momente nuk janë bërë të ditura detaje të tjera mbi burimin apo natyrën e kërcënimit. Nuk raportohet ende për pasoja të tjera nga incidenti.