Hita mbledh strukturat e Policisë në 4 qarqe: Të goditen grupet kriminale!

Intensifikimi i masave për parandalimin dhe goditjen e veprimtarive kriminale, rritja e parametrave të sigurisë publike dhe asaj rrugore, marrja e masave për sigurinë në shkolla, etika dhe shërbimi ndaj qytetarëve, në fokus të takimeve të Drejtorit të Përgjithshëm të Policisë së Shtetit me strukturat e Policisë në Vlorë, Gjirokastër, Shkodër dhe Lezhë.

Drejtori i Përgjithshëm Drejtues Madhor Skënder Hita ka vijuar takimet me strukturat vendore dhe ato të kufirit, në kuadër të intensifikimit të masave për sundimin e ligjit në territor.

Gjatë takimeve në Vlorë, Gjirokastër, Shkodër dhe Lezhë, Drejtor Hita u ndal te situata kriminale, kryesisht te krimet e rënda, si dhe te kultivimi dhe trafikimi i narkotikëve.

Hita kërkoi që Policia Kriminale të angazhohet maksimalisht në drejtim të sigurimit të informacionit dhe më pas të veprohet ndaj elementeve që qarkullojnë me armë zjarri, armë të ftohta, lëndë eksplozive, lëndë narkotike, si dhe ndaj atyre që kultivojnë bimë narkotike.

Drejtori theksoi se kjo situatë duhet të ndryshojë menjëherë, qoftë për krimet e rënda, ashtu edhe për kultivimin e kanabisit.

Drejtor Hita: “Të punohet me hetime proaktive për të evidentuar dhe goditur grupet kriminale dhe të intensifikohet puna hetimore për zbardhjen e ngjarjeve kriminale të ndodhura më parë.”

Gjithashtu, Drejtori u ndal te siguria rrugore, e cila është shqetësuese, pasi, pavarësisht angazhimit maksimal të Policisë Rrugore me të gjitha mjetet inteligjente në dispozicion, përsëri çdo ditë konstatohet një numër i madh shkeljesh, të cilat janë burim rreziku për përfshirje në ngjarje rrugore.

Drejtori i Përgjithshëm i Policisë së Shtetit u ndal gjatë edhe te siguria në shkolla, pasi për pak ditë nis viti i ri shkollor dhe Policia e Shtetit duhet të bëjë gjithçka për sigurinë e nxënësve, jo vetëm për sigurinë fizike, por edhe për sigurinë ushqimore, në bashkëpunim me AKU-në, sigurinë kibernetike dhe sigurinë rrugore, me qëllim që nxënësit të ndihen të mbrojtur dhe të sigurt.

Në vijim, etika në komunikim, zbatimi i ligjshmërisë dhe ndjekja në dinamikë e adresimeve të qytetarëve ishin të tjera tema diskutimi me strukturat policore, për të cilat Drejtor Hita kërkoi më shumë angazhim nga shefat e komisariateve dhe drejtorët e qarqeve.

Drejtori kërkoi gjithashtu që shefat e komisariateve dhe drejtorët të presin qytetarët që kanë probleme, t’ua hapin telefonin dhe t’u japin zgjidhje shqetësimeve që ata kanë dhe që janë në kompetencë të Policisë.

Ndërkohë, gjatë takimeve, Drejtori Hita kërkoi edhe nga Policia Kufitare etikë në komunikim në pikat e kalimit, luftë pa kompromis kundër krimeve kufitare, marrëdhënie të forta bashkëpunimi me homologët, në interes të luftës kundër paligjshmërive ndërkufitare, si edhe koordinim të veprimeve për eliminimin e radhëve në rastet e fluksit.