Zbulohet arsenal armësh në Durrës/ Arrestohet 20-vjeçari, dyshohet se furnizonte grupet kriminale

Policia e Durrësit ka finalizuar operacionin e koduar “Baza”, duke zbuluar në Manzë një arsenal armësh dhe municionesh luftarake që, sipas dyshimeve, shërbente për furnizimin e grupeve kriminale. Gjatë operacionit u arrestua në flagrancë një 20-vjeçar, ndërsa u sekuestruan katër pistoleta, një kallashnikov, një armë gjahu, qindra fishekë dhe prova të tjera materiale.

Armët e sekuestruara do t’i nënshtrohen ekspertimit për të verifikuar nëse janë përdorur në ngjarje kriminale të mëparshme, ndërsa hetimet vijojnë për identifikimin e personave të tjerë të përfshirë në këtë veprimtari kriminale.

Njoftimi: 

Manzë / Durrës

Finalizohet operacioni policor i koduar “Baza”.

Zbulohet një bazë me arsenal armësh dhe municioni luftarak, që dyshohet se shërbente për furnizimin e grupeve kriminale.

Arrestohet në flagrancë një 20-vjeçar.

Sekuestrohen 4 pistoleta, 1 kallashnikov, 1 armë gjahu (shotgun), 6 krehëra, qindra fishekë luftarakë, 1 targë automjeti italiane dhe 1 aparat celular.

Në vijim të punës për goditjen e veprimtarisë kriminale në fushën e armëmbajtjes pa leje dhe parandalimin e ngjarjeve të rënda kriminale, bazuar edhe në informacionet e siguruara në rrugë operative, shërbimet e Stacionit të Policisë Manzë, në bashkëpunim me strukturat operacionale të DVP Durrës, organizuan dhe finalizuan me sukses operacionin policor të koduar “Baza”.

Si rezultat i këtij operacioni u zbulua një bazë ku mbaheshin armë zjarri dhe municion luftarak, që dyshohet se shërbenin për furnizimin e grupeve kriminale.

Gjatë kontrollit të ushtruar në banesën e shtetasit E. P., 20 vjeç, banues në Manzë, Durrës, shërbimet e Policisë gjetën dhe sekuestruan, në cilësinë e provës materiale, 4 armë zjarri pistoletë, 1 armë zjarri automatike model 56 (kallashnikov), 1 armë gjahu (shotgun), 6 krehëra, qindra fishekë luftarakë të kalibrave të ndryshëm, 1 targë automjeti italiane dhe 1 aparat celular.

Në përfundim të veprimeve procedurale u bë arrestimi në flagrancë i shtetasit E. P.

Armët do t'i nënshtrohen ekspertimit në Institutin e Policisë Shkencore, për të verifikuar nëse janë përdorur në ngjarje kriminale të ndodhura më parë.

Vijon puna për identifikimin dhe nxjerrjen përpara përgjegjësisë ligjore të personave të tjerë të përfshirë në këtë veprimtari kriminale.

Materialet procedurale do t'i referohen Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprat penale “Prodhimi dhe mbajtja pa leje e armëve, armëve shpërthyese dhe municionit” dhe “Prodhimi dhe mbajtja pa leje e armëve të gjuetisë dhe sportive”.