Investimet e huaja ‘vërshojnë’ në pasuri të paluajtshme, arritën në 404 milionë euro gjatë periudhës janar-mars

Nuk ka më kapital të huaj në fabrika industrie, nëpër miniera, projekte energjetike e aq më pak në bujqësi apo arsim. Paratë e huaja po përqendrohen gjithnjë e më shumë te ‘betoni shqiptar’.

Banka e Shqipërisë thotë se në tremujorin e parë të këtij viti vlera e investimeve të huaja direkte arriti në 404 milionë euro, me rritje prej 43 milionë euro në raport me të njëjtin tremujor të vitit të kaluar.

INVESTIMET E HUAJA DIREKTE

Janar-Mars 2024       354 mln euro
Janar-Mars 2025       361 mln euro
Janar-Mars 2026       404 mln euro

Banka thotë se 43% e këtyre parave ose gati 173 milionë euro u ‘hodhën’ në sektorin e pasurive të paluajtshme, Kjo është shifra më e lartë historike e investuar ndonjëherë në këtë sektor.

INVESTIMET NË PASURI TË PALUAJTSHME

Janar-Mars 2024         84 mln euro
Janar-Mars 2025       104 mln euro
Janar-Mars 2026       173 mln euro

Ndërsa vlera e investimet në pasuri të patundshme prej 2014-ës deri më tani ka kapërcyer 2.2 miliardë euro.

Për ekspertët e tregut të pasurive të paluajtshme, Shqipëria është ende një treg me leverdi për të huajt, pasi çmimet e pronave për ata janë të përballueshme. Por tregu real-estate është edhe më i lakuari edhe për pastrimin e parave.

Agjencia e Inteligjencës Financiare ka listuar në raportin për vitin e kaluar 7 tipologji pastrimi parash, ku në vend të parë vijon të jetë sektori i pasurive të paluajtshme, pasi 4 nga skemat e zbardhura ishin në këtë sektor.

Të huajt thotë Banka e Shqipërisë janë edhe një nga shkaqet për çmimet e larta të pronave në vend, pasi blerjet e tyre janë të përqendruar në zonat më të kushtueshme të Tiranës dhe përgjatë bregdetit. Në vitin e kaluar rreth 25% e banesave të shitura janë blerë nga shtetas jorezidentë.