Zbulimi tronditës / Gjenden mbetje të embrioneve njerëzore në kopshtin e një shtëpie, arrestohet mjekja 57-vjeçare

Pas zbulimit, autoritetet kanë arrestuar një mjeke patologe 57-vjeçare, e cila ishte pronarja e mëparshme e pronës.

Sipas agjencisë polake të lajmeve PAP, duke cituar Prokurorinë e Rzeszowit në juglindje të vendit, pronarët e rinj të shtëpisë në fshatin Lutorij, rreth 12 kilometra larg qytetit, zbuluan gjatë punimeve gërmuese sasi të mëdha mbetjesh mjekësore të groposura në truall.

Mes materialeve të gjetura kishte blloqe parafine, lama mikroskopike, si dhe mbetje biologjike. Sipas zyrës së prokurorit, ndër objektet e zbuluara ishte një fetus njerëzor dhe mbetje të tjera që dyshohet se i përkasin fetuseve njerëzore në faza të ndryshme të zhvillimit.

“Objektet u zbuluan gjatë punimeve në truallin e pronës. Midis mbetjeve u gjet një fetus njerëzor dhe mbetje të tjera që mund të jenë nga fetuse njerëzore, disa prej tyre në një fazë të hershme zhvillimi”, deklaroi një zëdhënës i prokurorisë.

Patologia po hetohet për përdhosje të kufomës dhe asgjësim të paligjshëm të mbetjeve të rrezikshme mjekësore. Nëse shpallet fajtore, ajo përballet me një dënim që varion nga dy deri në 12 vjet burg.

Hetimet për rastin janë ende në vazhdim, ndërsa autoritetet po punojnë për të përcaktuar origjinën e saktë të mbetjeve të gjetura dhe rrethanat në të cilat ato përfunduan në pronë.