Shpresë mes rrënojave në Kolumbi, nëna dhe foshnja 6 muajshe nxirren gjallë pas tërmetit shkatërrues (VIDEO)

Një moment emocionues është regjistruar në Kali të Kolumbisë, pas tërmetit të fuqishëm me magnitudë 7.4 që goditi vendin të hënën, më 10 gusht. Ekipet e shpëtimit arritën të nxjerrin të gjallë nga rrënojat një foshnjë vetëm 6 muajshe dhe nënën e saj.

Sipas pamjeve që janë bërë virale në rrjetet sociale, ekipet e kërkim-shpëtimit po punonin mes rrënojave të një ndërtese të shembur, kur zbuluan shenja jete. Pas një operacioni të vështirë, ata arritën të hapnin rrugën drejt foshnjës dhe nënës së saj.

Nëna kishte qëndruar pranë foshnjës dhe, sipas raportimeve, ishte përpjekur ta mbronte atë me trupin e saj gjatë shembjes së ndërtesës. Të dyja u nxorën të gjalla nga rrënojat, në një skenë që ka prekur thellë opinionin publik në Kolumbi.

Shpëtimi i tyre është kthyer në një simbol shprese mes pasojave të rënda të tërmetit, ndërsa ekipet e emergjencës vijojnë kërkimet për persona të tjerë që mund të kenë mbetur të bllokuar nën rrënoja.

Situata në Kali mbetet e rëndë, pasi disa godinat kanë pësuar dëmtime të konsiderueshme. Edhe një spital universitar i qytetit ka pësuar shembje në disa kate, duke detyruar evakuimin e qindra personave dhe nisjen e operacioneve për nxjerrjen e pacientëve të bllokuar.

Autoritetet dhe ekipet e shpëtimit vijojnë punën pa ndërprerje, ndërsa pamjet e shpëtimit të nënës dhe foshnjës janë ndër momentet më prekëse të kësaj tragjedie.