SHBA: Çdo vendosje e re minash nga Irani do të konsiderohet shkelje e armëpushimit

Sekretari amerikan i Mbrojtjes, Pete Hegseth, ka paralajmëruar se çdo vendosje e re minash nga Irani në Ngushticën e Hormuzit do të konsiderohet shkelje e armëpushimit me SHBA-në.

Ai tha se lëvizjet në këtë rrugë strategjike detare janë tashmë të kufizuara dhe të rrezikshme, duke akuzuar Iranin për përpjekje për vendosje minash në zonë. Sipas tij, nëse kjo ndodh, SHBA do të reagojë menjëherë.

Pete Hegseth deklaroi se presidenti amerikan ka autorizuar ushtrinë të ndërmarrë veprime të forta ndaj çdo kërcënimi ndaj anijeve tregtare apo forcave amerikane.

Ndërkohë, zyrtarë ushtarakë amerikanë kanë thënë se Irani ka kryer sulme dhe sekuestrime anijesh në zonë, ndërsa prania detare e SHBA-së është shtuar me forca shtesë.

Nga ana tjetër, Irani e ka cilësuar praninë ushtarake amerikane si shkelje të armëpushimit dhe ka kërkuar tërheqjen e saj si kusht për rifillimin e negociatave.