Zjarret masive në Shqipëri, 19 vatra, 4 aktive, mbi 290 hektarë të shkatërruar

Gjatë 24 orëve të fundit, Shqipëria ka përjetuar 19 vatra zjarri në shumë zona të vendit, me 4 prej tyre ende aktive dhe të pakontrolluara. Zjarret kanë prekur bashkitë Dibër, Bulqizë, Mat, Rrogozhinë, Vorë, Tiranë, Vlorë, Kuçovë, Krujë, Librazhd, Prrenjas, Malësi e Madhe dhe Korçë.

Në Parkun Kombëtar Lurë, në qarkun e Dibrës, flakët kanë djegur rreth 150 hektarë pyje me pisha dhe livadhe, ndërsa përpjekjet për shuarjen e zjarrit pengohen nga terreni i vështirë dhe era e fortë. Mbi 100 ushtarë janë angazhuar në terren për ta kontrolluar situatën.

Një tjetër vatër e rrezikshme vazhdon në Malin e Peladhisë në Bulqizë, duke u përhapur drejt Majës së Vlashes, ndërsa forcat e sigurisë monitorojnë zonat pranë fshatit Arras për të parandaluar përhapjen e flakëve drejt banesave.

Në Fier, zjarri në Mallakastër ka shkatërruar mbi 292 hektarë tokë, duke përfshirë edhe plantacione me kumbulla, qershi dhe ullinj. Në përpjekje për fikjen aktive janë 58 forca zjarrfikëse dhe ushtarake, me 36 automjete të specializuara.

Sipas Institutit të Gjeoshkencave, rreziku i zjarreve mbetet i lartë në qarqet Lezhë, Tiranë, Elbasan, Fier, Berat dhe Gjirokastër, ndërsa në qarqet e tjera rreziku është moderuar.

Meteorologjia parashikon reshje të dobëta shiu në disa qarqe gjatë ditës, por këto nuk mjaftojnë për të kontrolluar të gjitha vatrat.

Sistemi i mbrojtjes civile është në gatishmëri maksimale dhe apelon te qytetarët të shmangin ndezjen e zjarreve në natyrë dhe të raportojnë menjëherë çdo vatrë të re. Ndërgjegjësimi dhe kujdesi janë kyç për të parandaluar dëme më të mëdha në mjedis dhe jetë njerëzish.