Ambasada e SHBA reagon pas emërimit të Eric Wendt si ambasador në Shqipëri: Do të mbështesë vizionin e Trump

Gjenerali në pension Eric Wendt do të jetë ambasadori i ardhshëm i Shteteve të Bashkuara në Shqipëri. Ambasada e Shteteve të Bashkuara në Tiranë ka konfirmuar emërimin e tij si ambasadorin e ardhshëm, pasi mori edhe votat në Senat.

Përmes një postimi në rrjetet sociale, Ambasada Amerikane e ka uruar Wendt për detyrën e re dhe ka deklaruar se pret me kënaqësi ardhjen e tij në Tiranë.

Ambasada thekson se Wendt do të mbështesë në Shqipëri vizionin e presidentit amerikan Donald Trump për siguri të përbashkët, forcimin e NATO-s dhe krijimin e marrëveshjeve të drejta për bizneset amerikane.

Reagimi i ambasadës amerikane:

U konfirmua! Urime Gjenerallejtënantit (në pension) Eric Wendt për rolin e tij të ri si Ambasadori i ardhshëm i Shteteve të Bashkuara në Shqipëri!

Presim me kënaqësi Ambasadorin e emëruar Wendt në Tiranë, nga ku do të mbështesë vizionin e Presidentit Trump për siguri të përbashkët, një NATO më të fortë dhe marrëveshje të drejta për bizneset amerikane.