Propozimi për shkrirjen e Fushë-Arrëzit, banorët në protestë: Mos na hiqni bashkinë, do na zbehet identiteti i zonës

Propozimi për shkrirjen e Bashkisë Fushë-Arrëz ka nxjerrë banorët në protestë.

Qytetarë, të rinj dhe përfaqësues të diasporës janë mbledhur në qytet për të kundërshtuar reformën e re territoriale të propozuar nga qeveria.

Siç raportohet banorët e Fushë-Arrëzit kundërshtojnë shkrirjen e bashkisë, duke argumentuar se një vendim i tillë do të dobësonte përfaqësimin vendor, do të zbehte identitetin e zonës dhe do të ndikonte në largimin e mëtejshëm të banorëve nga qyteti dhe fshatrat përreth.

Në mbështetje të banorëve dhe kryebashkiakut të Fushë-Arrëzit janë rreshtuar edhe figura të Partisë Demokratike, ndërsa në protestë kanë marrë pjesë edhe kryebashkiakët e djathtë të Pukës dhe Mirdites.

Mes tyre ishte edhe Paulin Luli, ish-kandidat për deputet i Partisë Socialiste në zgjedhjet parlamentare të vitit 2017 në Qarkun Shkodër.