Goditi me mjet prerës një 56-vjeçar gjatë një konflikti, arrestohet 64-vjeçari në Vlorë (EMRI)

Policia e Vlorës ka arrestuar një 64-vjeçar, i cili plagosi një 56-vjeçar me mjet prerës gjatë një konflikti për motive të dobta mbrëmjen e djeshme.

Ngjarja ndodhi rreth orës 23:30 në lagjen “Uji i Ftohtë”, pranë vendit të njohur si “Rrapi”.

Sipas njoftimit të policisë, shtetasi Besnik Gjondeda banues në këtë lagje, u arrestua për veprat penale “Plagosja e rëndë me dashje” dhe “Prodhimi, mbajtja, blerja apo shitja pa leje e armëve të ftohta”.

Ndërkohë, i plagosuri, shtetasi G. V., ndodhet nën kujdesin e mjekëve në Spitalin Rajonal të Vlorës dhe sipas autoriteteve, është jashtë rrezikut për jetën.

Njoftimi i Policisë:

Strukturat e DVP Vlorë dhe shërbimet e Komisariatit të Policisë Vlorë ndërhynë menjëherë për parandalimin e përshkallëzimit të një konflikti të ndodhur në qytetin e Vlorës, duke kapur dhe neutralizuar menjëherë autorin.

Si rezultat i reagimit të shpejtë dhe i veprimeve hetimore e procedurale, u arrestua në flagrancë për veprat penale “Plagosja e rëndë me dashje” dhe “Prodhimi, mbajtja, blerja apo shitja pa leje e armëve të ftohta”, shtetasi Besnik Gjondeda, 64 vjeç, banues në lagjen “Uji i Ftohtë”, Vlorë.

Ky shtetas më datë 11.07.2025, rreth orës 23:30, në një lokal pranë vendit të quajtur “Rrapi”, në lagjen “Uji i Ftohtë”, gjatë një konflikti për motive të dobëta, ka goditur me mjet prerës, në pjesën anësore të kraharorit, shtetasin G. V., 56 vjeç, i cili ndodhet nën kujdesin e mjekëve në Spitalin Rajonal Vlorë, jashtë rrezikut për jetën.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.