Katër persona kapen duke shitur 7 armë zjarri në Tiranë, blerës ishte asgjenti i infiltruar i policisë

Një grup kriminal i përfshirë në shitjen e armëve të zjarrit, lëndëve plasëse dhe municionit luftarak është goditur nga strukturat e Policia e Shtetit në kuadër të operacionit të koduar “Rrjeti”.

Gjatë operacionit të zhvilluar në Tiranë, efektivët e policisë kanë arrestuar 4 persona të dyshuar si pjesëtarë të grupit kriminal, ndërsa kanë sekuestruar 7 armë zjarri, sasi municioni luftarak dhe materiale të tjera që dyshohet se përdoreshin për aktivitetin e paligjshëm.

Sipas të dhënave paraprake, grupi dyshohet se merrej me tregtimin e armëve, lëndëve plasëse dhe municionit në zona të ndryshme të kryeqytetit. Operacioni erdhi pas një pune hetimore dhe veprimeve të mirëorganizuara policore për identifikimin dhe dokumentimin e aktivitetit kriminal të të dyshuarve.

Burimet thane se nje agjent i infiltruar i policise ka blere armet tek grupi kriminal per te provuar dyshimet paraprake se personat ne fjale kryenin trafikim dhe shitje te armeve te zjarrit.

Pamjet e publikuara nga policia tregojnë momentet e ndërhyrjes së forcave të rendit, si dhe materialet e sekuestruara gjatë kontrollit të ambienteve të përdorura nga personat e arrestuar.

Hetimet vijojnë për identifikimin e personave të tjerë të përfshirë në këtë rrjet kriminal, si dhe për zbardhjen e plotë të aktivitetit të tyre të paligjshëm.