"Besoni tek ëndrrat tuaja mos u dorëzoni kurrë", Rama takon nxënësit fitues të olimpiadave

Kryeministri Edi Rama ka zhvilluar një takim me nxënësit fitues të olimpiadave, ku ka shprehur mirënjohjen dhe vlerësimin për rezultatet e tyre, duke i cilësuar si shembull frymëzimi për të gjithë.

Duke iu referuar rezultateve të Shqipërisë në testin ndërkombëtar PISA 2025, Rama tha se ato përbëjnë një rezultat të rëndësishëm të një pune të gjatë për transformimin e sistemit arsimor dhe infrastrukturës së shkollave.

“Jam këtu për t’iu thënë disa fjalë mirënjohjeje, respekti dhe vlerësimi. Pak ditë pasi kemi marrë një lajm, që mua më ka pëlqyer shumë, testi i PISA 2025, i cili për mua personalisht është një fryt shumë i shijshëm i një pune shumë të gjatë, jo të lehtë, me të përpjeta dhe tatëpjeta për të transformuar sistemin tonë arsimor, për të transformuar infrastrukturën e shkollave tona”, tha Rama.

Kryeministri u ndal te fituesit e olimpiadave, duke theksuar se suksesi i tyre, edhe në kushte jo gjithmonë ideale, është një burim frymëzimi.

“Forca e shembullit tuaj është heroike. Ju jeni frymëzim, sepse në punën që unë bëj, kam nevojë që të frymëzohem nga shembuj njerëzish, që në kushte që nuk janë ideale për të bërë sukses, bëjnë sukses”, u shpreh ai.

Rama i këshilloi nxënësit të kenë besim te vetja dhe të mos heqin dorë nga objektivat e tyre, pavarësisht pengesave apo skepticizmit të të tjerëve.

“Kini besim të palëkundur te vetja dhe mbi të gjitha besojeni sy mbyllur ëndrrës që shikoni me sy hapur. Nëse ju ëndërroni me sy hapur që doni të arrini në një majë dhe që kushdo tjetër mund t’ju thotë ‘ej’, atëherë mos dëgjoni askënd që ju thotë se ‘kjo nuk arrihet’”, tha kryeministri.

“Është nder që të jem këtu me ju dhe është privilegj për këtë godinë, që të ketë këtu njerëz të kapacitetit tuaj për të ëndërruar dhe të fuqisë tuaj për të ndjekur ëndrrën”, shtoi ai.

Në vijim, Rama u bëri thirrje nxënësve që të përballen me çdo vështirësi në rrugën drejt realizimit të synimeve të tyre.

“Ushqejeni sa të mundemi atë fuqi dhe mos u dorëzoni kurrë dhe mos e tradhtoni kurrë ëndrrën që keni. Nëse dikush këtu do të shkojë në Hënë, të jetë i bindur që të shkojë në Hënë, por ama do jetë gati që për të shkuar atje, duhet të jetë gati të përballet me çdo sfidë që del përpara”, theksoi Rama.

Vlerësimi i “PISA 2025” për Shqipërinë

Në raportin e publikuar për “PISA 2025”, Shqipëria mori mesatarisht 435 pikë në shkencë, 408 pikë në lexim dhe 433 pikë në matematikë.

Shqipëria renditet në vendin e parë në rajon në shkencë, duke lënë pas vende si Serbia, Greqia, Mali i Zi, Bullgaria dhe Maqedonia e Veriut. Në matematikë, Shqipëria udhëheq klasifikimin rajonal së bashku me Malin e Zi.

Krahasuar me vitin 2022, rezultatet e Shqipërisë janë përmirësuar me 65 pikë në matematikë, 59 pikë në shkencë dhe 50 pikë në lexim.