Aksident në Elbasan/ Makina përfundon në lokal, dy të plagosur rëndë

Një aksident i rëndë është regjistruar mëngjesin e sotëm në Elbasan, ku një automjet ka dalë nga rruga dhe ka përfunduar brenda ambientit të një lokali, duke shkaktuar panik dhe dëme të mëdha materiale.

Ngjarja ka ndodhur rreth orës 07:55, pranë kryqëzimit midis stadiumit “Elbasan Arena” dhe Parkut “Rinia”, një zonë mjaft e frekuentuar në këtë orar.

Si pasojë e përplasjes së fortë, dy persona që ndodheshin në lokal janë plagosur rëndë dhe janë transportuar me urgjencë në Spitalin Rajonal të Elbasanit, ku po marrin trajtim mjekësor.

Policia ndodhet në vendngjarje dhe ka nisur hetimet për të zbardhur rrethanat e aksidentit. Shkaqet që çuan në humbjen e kontrollit të mjetit mbeten ende të paqarta. Autoritetet po analizojnë pamjet e kamerave të sigurisë dhe po marrin dëshmi nga të pranishmit për të kuptuar nëse bëhet fjalë për një defekt teknik, shpejtësi tej normave apo ndonjë faktor tjetër.