Ndarja nga jeta e Sefedin Braho-s, ndeshjet do të fillojnë me një minutë heshtje

Futbolli shqiptar është tronditur nga lajmi i ndarjes nga jeta të Sefedin Brahos. Ish-futbollisti i Luftëtarit dhe Partizanit është ndarë nga jeta në moshën 72-vjeçare.

Sefedin Braho në karrierën e tij futbollistike ka kontribuar edhe për Kombëtaren shqiptare teksa ka veshur fanellën kuqezi 9 herë, ndërsa ka ngritur lart një titull kampion me Partizanin.

Për ndarjen e Brahos nga jeta në të gjitha sfidat e ditës së sotme në futbollin shqiptar do të mbahet 1 minutë heshtje në nderim të figurës së tij.

“Federata Shqiptare e Futbollit bën me dije se në të gjitha ndeshjet e kampionatit shqiptar të Superiores, Kategoria e Parë dhe Kategoria e Dytë sot dhe nesër do të mbahet një minutë heshtje në nderim të ish-futbollistit të shquar, Sefedin Braho, i cili u nda nga jeta sot”, njofton FSHF.