Maratona "Skampa" në Elbasan, pjesëmarrës 1500 atletë nga Shqipëria dhe Europa

Ditën e sotme është zhvilluar “Half Maratona dhe Mini Maratona Skampa 2024” në Elbasan.

Ky aktivitet sportiv me përmasa ndërkombëtare u zhvillua për herë të dytë në këtë qytet me pjesëmarrjen e 1500 atletëve nga Shqipëria, Rajoni, Europa dhe nga shtete të tjera nga kontinente të ndryshme.

Maratona përfshiu gara në distanca prej 5 km, 10 km dhe 21 km, duke përçuar mesazhe të fuqishme për rëndësinë e një jetese aktive dhe promovimin e turizmit në qytet.

Çdo vit, kjo ngjarje ka sjellë një intensitet të veçantë, duke përforcuar imazhin e Elbasanit si një qytet që mbështet sportin dhe një stil jete të shëndetshëm.

Mes pjesëmarrësve kishte emra të spikatur të atletikës nga të gjitha grupmoshat.

Kryebashkiaku i Elbasanit , Gledian Llatja u shpreh se synimi i kësaj bashkie është që ky aktivitet të kthehet në traditë, pasi ka një ndikim të madh në promovimin e Elbasanit edhe ka ndikim në zhvillimin e turizmit.

Gjysmë maratona dhe minimaratona Skampa 2024 startoi në orën 09:00 në sheshin para Portës së Kalasë së Elbasanit dhe u mbyll pas orës 12:30.