Marash Kumbulla gjen rrjetën, trimfon Espanyol në sfidën ndaj Mallorca

Marash Kumbulla ka hapur serinë e golave këtë të shtunë në sfidën e La Liga, midis Espanyol dhe Mallorca.

Espanyol i mbrojtësit kuqezi ia ka dalë të fitojë në shtëpi.

Një kros të Jofre, Kumbulla e shfrytëzoi më së miri në minutën e 18-të të takimit duke e dërguar mrekullisht me kokë në portë.

Ky ishte goli i parë i Kumbullës me fanellën bardhekaltër të katalanasve, që ngriti peshë 40.000 tifozë në RCDE Stadium.

Që prej transferimit te Espanyol në merkaton e verës nga Roma, shkodrani është kthyer në një nga shtyllat e formacionit, duke luajtur 8 ndeshje si titullar për 90’ minuta.

Sa i përket sfidës së sotme, Espanyol triumfoi me rezultatin 2-1, duke u ngjitur përkohësisht në vendin e 12 të tabelës me 10 pikë, ndërsa Kumbulla u vlerësua si lojtari më i mirë i ndeshjes me notën 8.6.

Kujtojmë se 24-vjeçari është pjesë e listës së teknikut Sylvinho për dy ndeshjet e radhës së Kombëtares në Ligën e Kombeve. Ai pritet që të zbresë sërish si titullar në fushë përkrah Ismajlit, duke parë edhe dëmtimin që kapiteni Gjimshiti pësoi në ndeshjen e fundit të Atalantës.