E quajti "hallexhie", Monika Kryemadhi i përgjigjet live Ramës: O satelit pa bisht

Monika Kryemadhi i është përgjigjur drejtpërdrejt kryeministrit Edi Rama, pas deklaratave të këtij të fundit në emisionin "Opinion" duke e quajtur "hallexhie". Ai ju referuar përballjes së saj me drejtësinë dhe mesazheve që deputetja ka deklaruar se ka me Ramën në celular.

"Pa merak o satelit pa bisht se ne këmbësorët ta kemi fijen për të të sjellë me këmbë në “tokë”, shkruan Kryemadhi në llogarinë e saj.

I pyetur nga Blendi Fevziu se çfarë ka biseduar me ish-kryetaren e LSI, Rama u shpreh se nuk flet me njerëz që janë në hall. Gazetari ngulmoi duke i thënë nëse është vetë në hall nga këto mesazhe, kryeministri tha se nuk ka probleme të kësaj natyre.

Blendi Fevziu: Çfarë mesazhesh keni shkëmbyer me Monika Kryemadhin? A ka pasur pazare politike, të vendosim këtë drejtor, të vendosim këtë, të heqim këtë?

Edi Rama: Më vjen shumë keq zonja është në hallin e vet dhe unë me njerëz që janë në hall të madh nuk debatoj.

Blendi Fevziu: A jeni ju në hall nga këto mesazhe përveç halleve të zonjës?

Edi Rama: E di si është kjo pyetje të të them unë ti je në hall mo Fevzi se më dukesh içik i hutuar? Ti je në hall tani për shembull që po mi bën mua apo nuk po mi bën mua pyetjet e duhura? Çfarë pyetje është kjo?