Teherani: Asnjë litër naftë nuk kalon në Hormuz pa miratimin tonë

Irani ka lëshuar një tjetër paralajmërim të fortë lidhur me kontrollin e Ngushticës së Hormuzit, duke deklaruar se asnjë anije me naftë nuk do të lejohet të kalojë pa miratimin e Teheranit.

Deklarata u bë nga Ebrahim Rezaei, zëdhënës i Komitetit Parlamentar Iranian për Sigurinë Kombëtare dhe Politikën e Jashtme.

Sipas tij, Irani nuk ka ndërmend ta rihapë plotësisht ngushticën dhe do të mbajë kontroll të rreptë mbi kalimin e anijeve cisternë.

“Ata nuk do të jenë në gjendje të kalojnë as edhe një litër naftë përmes Ngushticës së Hormuzit pa lejen e Republikës Islamike”, deklaroi Rezaei.

Ai shtoi se çdo shenjë dobësie nga ana e Iranit do të inkurajonte më shumë presion nga Shtetet e Bashkuara.

“Nëse amerikanët shohin edhe lëshimin më të vogël ose tërheqjen prej nesh, ata me siguri do të bëhen edhe më të guximshëm”, u shpreh ai.

Deklaratat vijnë në një moment tensionesh të larta në rajon, ndërsa Strait of Hormuz mbetet një nga korridoret më të rëndësishme për tregtinë globale të naftës.