Kryeministri japonez do të takohet me Trump gjatë vizitës në SHBA

Kryeministri japonez Shigeru Ishiba do të takohet me presidentin amerikan Donald Trump gjatë një vizite në Shtetet e Bashkuara këtë javë, tha sot zëdhënësi i qeverisë Yoshimasa Hayashi.

“Nëse kushtet e lejojnë, Ishiba do të vizitojë Shtetet e Bashkuara nga data 6 deri më 8 shkurt dhe do të takohet me Presidentin Trump në Uashington”, tha ai.

“Përmes kësaj vizite, ne shpresojmë të ndërtojmë një marrëdhënie të fortë besimi me administratën e re amerikane dhe të përmirësojmë aleancën midis SHBA-së dhe Japonisë”, shtoi ai.

Nëntorin e kaluar, Shigeru Ishiba pati një bisedë të shkurtër telefonike me Trump, i cili ende nuk ishte betuar si president, dhe kërkoi ta takonte atë në janar përpara se të merrte detyrat presidenciale. Por takimi nuk u realizua.

Javën e kaluar, Shigeru Ishiba theksoi rëndësinë e marrëdhënieve të ngushta me SHBA-në për stabilitetin rajonal.

“Në një kohë kur balanca e fuqisë në rajon është në një pikë kthese historike, ne duhet të thellojmë bashkëpunimin Japoni-SHBA në një mënyrë të qëndrueshme”, i tha Ishiba Parlamentit të premten e kaluar.