Akuzohet për rushfet, Yulia Tymoshenko lirohet me garanci mbi 600 mijë euro! Disa masa kufizuese

Gjykata Supreme e Ukrainës Kundër Korrupsionit ka vendosur një masë paraprake në formën e një garancie prej afërsisht 660,000 eurosh për ish-kryeministren dhe deputeten Yulia Tymoshenko, pas akuzave për tentativë ryshfeti ndaj deputetëve.

“Nuk do të shkoj askund, do të qëndroj këtu derisa vendi të çlirohet nga regjimi fashist që e sundon”, tha Tymoshenko gjatë seancës dëgjimore.

Përveç lirimit me kusht, arsyetimi i gjykatës përfshin një sërë kushtesh kufizuese për Tymoshenkon. Konkretisht, ajo kërkohet të paraqitet kur thirret nga gjykata, hetuesi ose prokurori.

Ajo do të dorëzojë dokumentet e udhëtimit për ruajtje, të përmbahet nga çdo komunikim me 66 deputetë, të mos largohet nga kufijtë e rajonit të Kievit dhe të informojë autoritetet për çdo ndryshim të vendbanimit ose punës.

Vendimi nuk përmend detyrimin për të mbajtur një byzylyk elektronik, i cili ishte ngritur si një mundësi në procedurë. Gjatë seancës dëgjimore, gjykata hodhi poshtë gjithashtu kërkesat e mbrojtjes për paraqitjen e një regjistrimi të plotë të bisedës së Tymoshenkos me deputetin Igor Kopytin, si dhe kërkesën për ta thirrur atë për të dëshmuar.

Më 13 janar, Byroja Kombëtare Kundër Korrupsionit dhe zyra e prokurorit kompetent (SAPO) zbuluan një përpjekje për të korruptuar deputetët nga kreu i një fraksioni parlamentar, me qëllim votimin pro ose kundër projektligjeve specifike.

Një ditë më vonë, më 14 janar, Tymoshenko konfirmoi se ishin kryer kontrolle në zyrat e partisë së saj, duke hedhur poshtë kategorikisht të gjitha akuzat kundër saj.