Temperaturat e larta rreziqe për zjarre, Komitetit të Mbrojtjes Civile në mbledhje urgjente, ja çfarë u vendos

Kohët e fundit, vendi ynë po përballet me një valë të nxehtësie të pazakontë, e cila ka rritur ndjeshëm rrezikun e zjarreve në të gjithë territorin.

Sot, u zhvillua një mbledhje urgjente e Komitetit të Mbrojtjes Civile, e drejtuar nga ministri Pirro Vengu.

Gjatë takimit, u diskutuan dhe miratuan masa të posaçme për mobilizimin e trupave dhe forcimin e reagimit ndërinstitucional në nivel kombëtar, me qëllim garantimin e sigurisë së qytetarëve dhe mbrojtjen e mjedisit nga zjarret dhe efektet e të nxehtit ekstrem.

“Në kushtet kur parashikohen temperatura të larta përgjatë gjithë javës, dhe ndërkohë që përpjekjet vijojnë në shumë fronte nga veriu në jug të vendit, ndamë planin e masave me të gjithë titullarët e institucioneve të përfshira në mekanizmin e mbrojtjes civile, prefektët e qarqeve dhe kryetarët e Bashkive më të ekspozuara ndaj zjarreve:

Rritje e nivelit të gatishmërisë së trupave vendore në dispozicion të prefektëve;

Rritje e vigjilencës dhe monitorim i pandërprerë i terrenit në çdo bashki për raportim të menjëhershëm;

Pozicionim i forcave në zonat me risk për të shkurtuar kohën e reagimit;

Ndërhyrja nga ajri do të vijojë me përparësi në zonat e banuara dhe zonat e mbrojtura;

Bashkërendim me mekanizmin Evropian të Mbrojtjes Civile për kapacitete shtesë”, shkruan ministri në një postim në rrjetet sociale.