Ajeti: Na kishte munguar prej kohësh kjo atmosferë në Kombëtare
Mbrojtësi i Kombëtares shqiptare, Arlind Ajeti, doli sot në konferencë për shtyp për të folur për sfidën e 8 qershorit në transfertë me Islandën.
Kuqezinjtë janë grumbulluar aktualisht në Frankfurt të Gjermanisë, ku po kryejnë përgatitjet e fundit për sfidën me islandezët.
“Jemi duke u stërvitur me intensitet dhe më duket çdo gjë shumë mirë deri tani. Atmosfera mes stafit dhe mes lojtarëve ka qenë shumë e mirë, diçka që na ka munguar për një kohë të gjatë”, pohon Ajeti.
Në lidhje me repartin e mbrojtjes, futbollisti që luan me Grasshopper në Zvicër thekson: “Ne si lojtarë në çdo ndeshje mundohemi të japim maksimumin dhe pavarësisht trajnerit ne luajmë për kombin tonë. Nuk kam një përgjigje, nuk e di pse ka qenë kështu mbrojtja. Ka pasur ndeshje që nuk kemi luajtur mirë në mbrojtje apo në sulm, por janë të gjithë fajtorë dhe shpresoj që ndeshjet e ardhshme do të përmirësohemi”.
Merr lajme ekskluzive në Whatsapp
Doni të informoheni të parët për lajme ekskluzive? Bashkohuni me grupin tonë në Whatsapp duke klikuar këtu.
Në fund Ajeti deklaroi: “Të luajturit me zemër, duke mbrojtur mirë dhe duke dhënë gjithçka kemi është forca jonë. Trajneri na ka dhënë diçka ekstra dhe do mundohemi t’i zbatojmë detyrat që na jep ai”