Tirane – Lajmifundit – Kryetari i Bashkisë së Tiranës, Lulzim Basha deklaroi sot se plani i ri urbanistik i kryeqytetit do të zgjidhë çështjen e unazës së Madhe, parkingjeve dhe tramvajit për Tiranën.
Deklarata u bë në një takim që Lulzim Basha zhvilloi me akademikë dhe ekspertë të njohur të fushës së arkitekturës ,ku është debatuar për planin e ri urbanistik të kryeqytetit.
Basha ka theksuar se plani i ri urbanistik është një sfidë e vështirë por jo e pamundur. Duke e cilësuar planin rregullues si një domosdoshmëri për kryeqytetin, Basha ka theksuar gjithashtu se është me rëndësi të zgjidhet edhe konflikti artificial mes qytetit dhe qytetarëve.
“Ka ardhur koha që Tirana të ketë ambicien e plotë të zhvillimit të infrastrukturës, siç janë Unaza e Madhe, tramvaji dhe parkingjet nëntokësore të cilat do të mëshirojnë ambiciet bashkohore të qytetit tonë” ka theksuar Basha.
Sipas kryebashkiakut, plani i ri është i domosdoshëm për vetë faktin edhe të rritjes së popullsisë së kryeqytetit që sipas tij ka pasur edhe efektet negative si në infrastrukturë ashtu edhe në trafik dhe në mjedis.
Basha kerkoi bashkëpunimin jo vetëm të ekpertëve dhe botës akademike por edhe të qytetarëve në mënyrë që gjatë muajit maji të ketë një produkt të gatshëm për zhvillimin urban të qytetit.